BQXK-nin Azərbaycan nümayəndəliyinin rəhbəri Dövlət Miqrasiya Xidmətində olub

Dövlət Miqrasiya Xidmətinin (DMX) rəisi Vüsal Hüseynov Beynəlxalq Qızıl Xaç Komitəsinin (BQXK) Azərbaycan nümayəndəliyinin rəhbəri xanım Elena Aymone Sessera ilə görüşüb.

Tanışlıq xarakterli görüşün məqsədi ikitərəfli əməkdaşlıq əlaqələrinin genişləndirilməsidir.

V.Hüseynov Xidmət tərəfindən həyata keçirilən tədbirlər, görülən işlər barədə məlumat verib. Bildirib ki, Dövlət Miqrasiya Xidməti beynəlxalq təşkilatlarla sıx əməkdaşlıq edir. Beynəlxalq Qızıl Xaç Komitəsi ilə əməkdaşlığa önəm verildiyini söyləyən Xidmət rəisi əlaqələrin bundan sonra da davam və inkişaf etdiriləcəyini qeyd edib.

Xidmət rəisinə səmimi qəbula görə minnətdarlığını bildirən və görüşdən məmnun qalan xanım Elena Aymone Sessera Beynəlxalq Qızıl Xaç Komitəsinin Azərbaycanda reallaşdırdığı layihələrdən söhbət açıb. Təmsil etdiyi təşkilatla Dövlət Miqrasiya Xidmətinin arasında əməkdaşlığı yüksək qiymətləndirib.

Görüşdə ikitərəfli əməkdaşlığın perspektivləri və miqrasiya sahəsində  qarşılıqlı maraq doğuran məsələlər müzakirə olunub.