Mətbuat icmalı

Ankara mülki gəmilərə hücumları dayandırmağa çağırdı

Türkiyə Qara dənizdə mülki gəmilərə qarşı getdikcə artan hücumları dayandırmaq üçün həm Rusiya, həm də Ukraynaya çağırış edib. ABŞ-ın nüfuzlu "U.S. News" nəşrinin yaydığı məlumata görə, rəsmi Ankara kommersiya gəmiçiliyinin təhlükəsizliyinə yönəlmiş təhdidlərlə bağlı hər iki tərəfə sərt xəbərdarlıq göndərib. Son vaxtlar Qara dəniz hövzəsində taxıl və digər kommersiya yükləri daşıyan quru yük gəmilərinin hədəfə alınması Türkiyə tərəfindən ciddi narahatlıqla qarşılanıb.

Türkiyə rəsmiləri bəyan ediblər ki, mülki dəniz infrastrukturunun və ticarət gəmilərinin hərbi qarşıdurmanın tərkib hissəsinə çevrilməsi qəbuledilməzdir. Bu addımlar təkcə regional təhlükəsizliyi deyil, eyni zamanda qlobal tədarük zəncirini və ərzaq təhlükəsizliyini də birbaşa risk altına qoyur. Nəşrin qeyd etdiyi kimi, Ankara hər iki paytaxtı beynəlxalq dəniz hüququna riayət etməyə və azad naviqasiya prinsiplərini qorumağa çağırıb.

Mətbuat icmalında vurğulanır ki, Türkiyə müharibənin başladığı ilk günlərdən Montre boğazlar konvensiyasını tətbiq edərək Qara dənizdə gərginliyin artmasının qarşısını almağa çalışır. Ekspertlər qeyd edirlər ki, rəsmi Ankaranın bu son bəyanatı Qara dəniz ticarət yollarının yenidən tam təhlükəsiz vəziyyətə gətirilməsi üçün yeni bir diplomatik təşəbbüsün başlanğıcı ola bilər.

Mənbə: Yazıda  usnews internet səhifələrindən istifadə edilmişdir.
 

K.Ələkbərli
Baş redaktor